QUEN ENGANA A QUEN, SR. ALCALDE?
O BNG no concello de Barbadás quer sair ao paso da campaña propagandística difamatoria que está a levar o PP, tentando de culpabilizar ao noso grupo político da supresión do PAC ubicado no núcleo d’A Valenzá e acusándoo de “enganar aos viciños”.
Causa estupor o grau de cinismo político do Sr. Alcalde, sendo como é do domínio público que xa hai 4 anos, en Decembro de 2002, o Sr. Freire Couto tiña pactada coa Xerencia de Atención Primaria de Ourense -governando de aquela na Xunta o PP- a supresión do servizo de urxencias médicas do noso concello e que foron precisamente as iniciativas políticas e sociais do BNG as que impediran naquela altura a efectivización da medida, por supor unha decisión tomada exclusivamente con criterios economicistas e non mellorar a cualidade asistencial d@s usuari@s.
Pasados 4 anos, e demostrada sobradamente a incapacidade do PP para gobernar este concello e a incompetencia do seu Alcalde para dar solución ao grave défice sanitario que padece Barbadás, vense obrigados a empregar tácticas máis proprias da oposición e recorrendo -sen a menor decencia política- á mentira, á calunia e á manipulación social para tentar ocultar o fracaso dunha xestión que se prolonga -con maioria absoluta- desde hai 2 décadas.
Cando no Pleno do 29 de Xuño pasado, pola via de urxencia e sen coñecimento previo da oposición, o PP apresentara unha moción solicitando das autoridades municipais da Xunta a mantención do actual PAC, este grupo político nacionalista -intuindo unha posíbel manobra eleitoralista do Sr. Freire- exixiu evidencias obxectivábeis que xustificasen a adopción de tal acordo por parte do Pleno e que, perante a ausencia de probas, motivara a nosa abstención. A resposta do PP fundamentárase apenas na desconfianza gratuita que lle oferecia o compromiso a que tiña chegado en recentes conversas co Delegado de Sanidade de non supresión do servizo, apoiando tal suspeita en “informacións recebidas de profisionais sanitarios do PAC”.
O BNG, sendo coñecedor da determinación da Consellaria de Sanidade de proceder a mancomunar o dispositivo das urxencias sanitarias na comarca de Ourense coa intención de garantir un bon servizo á cidadanía, entrevistouse cos responsábeis da administración autonómica para exixirlles que mantivesen os actuais equipamentos sanitarios do concello de Barbadás encanto non se superasen as carencias estruturais que neste ámbito padecemos. E @s nacionalistas arrincáramos, naquel momento, o compromiso verbal e por escrito de que iso así sería.
Portanto, o BNG actuou -máis unha vez- con completa honradez e dilixencia na defensa dos intereses d@s usuari@s do PAC de Barbadás.
Porque fala entón o PP de que “o BNG engana aos viciños” ?. Onde está o engano ?. Quen engana a quen, Sr. Alcalde ?.
Cando, posteriormente, o Sr. Freire ten constancia irrefutábel da decisión da Consellaria de Sanidade de suprimir o PAC d’A Valenzá a partir do mes de Agosto, o primeiro que fai non é convocar un Pleno para analisar a nova situación criada e recadar o apoio do conxunto das forzas políticas que representan ao conxunto da cidadania neste concello –como sería a súa obriga se se comportase co sentido institucional e coa responsabilidade política inerente á condición de Presidente da Cámara Municipal de Barbadás-. Pois non. O que fai é planificar unha campaña demagóxica e intoxicadora, baseada na infamia e na inxuria, colocando no centro da “diana” non ao responsábel da medida –a Consellaria de Sanidade- senón áquela organización política que está en condicións de arrebatarlle a alcaldía, o BNG.
E todo isto, coa agravante de levar a cabo esa campaña instrumentalizando os meios económicos, materiais e humanos de que dispón o Concello de Barbadás -que pagamos tod@s cos nosos impostos e que deberan portanto estar ao servizo de tod@s- dun xeito partidista e eleitoralista.
Ao mesmo tempo, queremos denunciar a manipulación que o PP fai do conceito de “Concello” (que somente sería lexítimo usar facendo referencia ao conxunto das forzas políticas que representan á cidadania en Barbadás), confundindo premeditadamente institución municipal con partido e dando idea da concepción autoritaria e reaccionaria que sustenta a prática política deste partido.
Porén, este comportamento político -claramente antidemocrático- non nos extraña nada vindo como ven de persoas que se dedican a darlle brillo aos símbolos fascistas que ainda perduran no noso concello.
Conseguintemente, o BNG en Barbadás reclama do Sr. Alcalde o necesario consenso institucional, a convocatoria imediata dun Pleno Extraordinario e Urxente para recadar a unidade de todas as forzas políticas co obxectivo de conseguir que non se perda nengún dispositivo asistencial en Barbadás e a retirada de todas as faixas inxuriosas que con meios públicos ten colocado ilexitimamente o PP ao longo do concello.
Aliás, queremos deixar constancia do noso total apoio a todas aquelas iniciativas viciñais que, con procedimentos democráticos e guiadas polo interese colectivo, procuran axudar a resolver as problemáticas que padecemos e que as instancias administrativas e políticas que nos gobernan se mostran incapaces de solventar. Neste senso, e dada a absoluta inoperancia do PP, o BNG en Barbadás comprométese a seguir loitando pola criazón do Consello Municipal de Saúde para estimular e viabilizar a participación activa da comunidade na xestión e planificación sanitaria do Concello.
Noutra orde de cousas, tamén gostaríamos de deixar constancia da falta de seriedade das autoridades sanitarias da Xunta de Galiza. En primeiro termo, por incumprir os compromisos orais e escritos a que tiñan chegado con todas as forzas políticas con representación neste concello. En segundo lugar, por non ter a coraxe política de vir explicar publicamente aos/ás cidadáns/ás de Barbadás as bondades da nova reestruturación das urxencias sanitarias na comarca.
Se, en realidade, o que se pretende é que a cidadanía comprenda a pertinencia desas medidas é necesario e imprescindíbel para o BNG que sexan convenientemente aclaradas polos responsábeis de levalas a cabo.
O BNG en Barbadás é consciente de que nunca existiu un servizo de urxencias no noso concello, merecente de tal nome. A ubicación do PAC no actual Consultorio é un inconveniente insalvábel pola insuficiencia de espazo e a inexistencia de meios tecnolóxicos (laboratorio, radioloxia…) e humanos que permitan unha asistencia minimamente resolutiva para casos de emerxencia. Da evidencia de tais carencias derivou o facto de que, na prática, a maioria d@s potenciais usuari@s deste servizo se dirixan ás urxencias do hospital de Ourense cando precisan de consulta. Entendemos que coa nova proposta da Consellaría de Sanidade se mellorará o servizo de urxencias por contar con meios asistenciais axeitados, evitándose as esperas que se dan actualmente ao acudir ás urxencias hospitalarias da capital e incluir a atención pediátrica permanente a partir do 1 de Outubro, entre outras vantaxes.
Contodo, o BNG en Barbadás non está por defender que se perdan servizos asistenciais, consolidados ao longo do tempo. O BNG está por preservar o pouco que temos e exixir as melloras que en xustiza nos corresponden. Non acreditamos nas rebaixas políticas, nen damos cheques en branco. Queremos que se teña en conta e se valorice o facto de vivermos nun concello que medra exponencialmente (estamos á cabeza de Galiza) e que, de xeito contraditorio, padece uns défices en materia sanitaria enormes que nengunha administración (nen municipal nen autonómica) foi capaz ou tivo vontade até o momento de compensar.
Neste senso, consideramos urxente e primordial a construción dun novo Centro de Saúde. Resulta vergoñento que un concello governado por un médico durante tantos anos, non teña disposto dun terreno adecuado para a súa ubicación. Semella un sinal inequívoco de que o Sr. Freire Couto está máis preocupado pola saúde dos negocios especulativos, que contornan o sector imobiliario e da construción, do que da boa saúde dos viciños e viciñas de Barbadás.
Barbadás, 31 de Xullo de 2006
O BNG colabora co Colectivo Cidadán Pro Centros Públicos en Barbadás.
