Contacta connosco
O Galo, voceiro do BNG de Barbadás
MOCIÓN RELATIVA AO ESTADO DA RUA DO VISO DA VALENZÁ E ARREDORES
Reis Rodríguez Do Pazo, Susana María García Rodríguez e Xosé M. Alonso Noceda, integrantes do grupo municipal do BNG de Barbadás, ao abeiro do disposto na LRBRL e demais disposicións de concordante aplicación, apresentan para o seu debate e aprobación a seguinte MOCIÓN
EXPOSICIÓN DE MOTIVOS
Hai xa dous anos que comezaron a construirse edificacións na Rúa do Viso d’A Valenzá. Dous anos nos que os viciños residentes na zona e todos aqueles que transitan por esta vía teñen que soportar a suxidade que provocan as obras, a ocupación da calzada con entullos e material de construción e incluso a desaparición de parte da estrada, co conseguinte perigo para peóns e vehículos por ficar a vía só habilitada para un carril.
A estes problemas compre engadir os derivados da forte presenza de pó nos días secos que repercute negativamente na saúde do vicindario, nomeadamente naquelas persoas aqueixadas de afeccións respiratorias e alerxias.
Nestas últimas semanas a caótica situación vese agravada polas obras que se están levando a cabo no polígono AR-3.
A deixadez de funcións que mostran os responsábeis municipais é evidente, máxime se temos en conta que esta corporación aprobou unha ordenanza que regula a ocupación de terreos de uso público na que específicamente se recolle que “cando con ocasión dos aproveitamentos regulados nesta ordenanza se produciran desperfectos no pavimento, vía pública, instalacións ou bens de uso público, os titulares estarán obrigados a reparar ou reconstruir os danos causados. Se os danos fosen irreparables o concello será indemnizado”.
Son moitas as denuncias que xa se fixeron chegar ao concello por parte dos afectados e moitos máis os viciños que, coa súa asinatura, queren manifestar o seu malestar coa situación insustentábel que se vive nesta zona.
Por todo o anteriormente exposto, solicitamos do Pleno a adopción dos seguintes
ACORDOS
1- As autoridades municipais obrigarán ás empresas que operan na zona –e en futuros emprazamentos- a manter limpas as rúas e a retirar os entullos e materiais de construción que invaden a calzada.
2- No caso de ter que ocupar a vía pública con valos, andamios e outras instalacións análogas, sinalizaranse convenientemente.
3- A policia local controlará o tránsito de camións e máquinas excavadoras que continuamente interrompen a intersección da Rúa do Viso coa Avda. de Celanova.
4- Exixirase o emprego de mecanismos axeitados para evitar ou minorar as concentracións de pó, froito das excavacións que se están a realizar na zona.
Barbadás, 30 de Marzo de 2006.
O BNG colabora co Colectivo Cidadán Pro Centros Públicos en Barbadás.
